Wednesday, May 25, 2011

ألف مبروك

كلمتين باختصار كدا

لو مش ممانع محاكمات المدنيين العسكرية و شايف أنها مهمة للردع و أنها قانونيا سليمة ﻷن حالة الطوارىء مستمرة، براحتك، بس أفتكر اللوا العصران لما أكد لنا إلتزام المجلس بالقانون ﻷن عكس ذلك يؤدي ﻷدانة مصر دوليا. بما أن حالة الطوارىء مستمرة يبقى كل الناس تتحاكم عسكريا و النيابة العامة تقفل و المحاكم تقفل و محكمة اﻷسرة تتحول للقضاء العسكري و لما تخبط عربية إللي قدامك تاخد 15 سنة في السجن الحربي.. أو نرفع الطواريء و كل البشر تاخد فرصتها في المحكمة المدنية و العدالة. ..ﻷ ﻷ بس البلطجية برضة لازم يتحاكموا عسكريا عشان "الردع"..براحتك

!

لو شايف أن كل حاجة عايزة وقت و أننا لازم نهدا عشان البلد حالها ينصلح و عشان يبقى فيه مكسرات في رمضان، حاول تلاحظ أن التظاهر مش نزهة و أن الجو حر و الناس إللي ماشية و رافعة يفط مش مرتاحة و لا غاوية و لا فاضية و لا نفسها تتظاهر و منهم بيشتغل يوم الجمعة و مش أجازة و لكن مفيش بديل فعال ممكن تلجأ ليه و يوصل صوتك بوضوح وشفافية و أمانة و يستوعب كل اﻹتجاهات

آآآه

أصل إحنا في مرحلة انتقالية و معندناش برلمان و الحوار الوطني مضروب و اﻷئتلاف موكوس و الحوار الجماهيري بيسيطر علية الجماعات الدينيية. صح، بس هو في ضمان أن ما بعد المرحلة اﻹنتقالية مجلس الشعب حيمثل إرادة الشعب و إن مفيش تزوير؟ ﻷ طبعا مفيش تزوير ..ماهو الإستفتاء مكنش فيه تزوير. ماشي..أكيد اﻷستفتاء كان فيه تجاوزات بس مش ممنهجة ﻷن وقتها الشرطة كانت لسة مصدومة، لو متابع تعرف أن القيادات رجعت و فية مديرين أمن بيتحاكموا في قضايا قتل.. و فيه ضبات عليهم أحكام جنائية طعنوا فيها و رجعوا و فيه ضبات بيهددوا أهالي الضحايا و المصابين و فيه امن دولة زي ما هو لسة متواصل مع الناس أصحاب المصالح و في مكتبة اسكندرية كانت حتكرم ضباط التعذيب عشان تحسن العلاقة بين الشعب و الشرطة..طبعا كل ما سبق يخليك متأكد إن اﻹنتخابات القادمة نزيهة جدا و الصندوق هو الحكم. أنت شايف أن الوزير الجديد نزيهة..وارد.. بس محاربة الفساد تستدعي ما هو أكتر من النزاهة مش كدا؟ ﻷ؟ طب أشمعني المحاكمات العسكرية حلوة في الردع..طب ما نصبر علي البلطجية برضة و إنك لا تهدي من أحببت؟

.....

دي حاجات بسيطة كدا غير تعذيب المعتصمين و التراخي و فرجة اﻷمن و الجيش علي أمبابة و موقعة ماسبيرو وكنيسة صول إللي كلنا شوفنا مين هدها بس برضة كان لازم محمد حسان يروح يجبر الخواطر و الحساب عند ربنا॥أو يمكن مش أو يمكن مش حيتحاسب عشان دا هد كنيسة يا عم ياكشي يول

معلش أصل الجيش متخبط و معندناش إدارة أزمات....آه

نسيت معلش

.............

أبوس أيدك لو مش عايز تتظاهر متتظاهرش بس حاول تستوعب على اﻷقل إن مفيش حاجة أسمها حسن نية في السياسة و أن الجيش و الشعب مش لازم يكونوا إيد واحدة إطلاقا، بدليل أنك متعرفش و لا ممكن تعرف ميزانية الجيش و لا معاش مبارك العسكري و لا ممكن تاخد أمتيازات مساكن الضباط و لاخصومات المواصلات و الحج و لا امتيازات العسكريين في مصر بصفة

الحاجة الوحيدة إللي تجمعك بيهم هو أنك دلوقتي تقدر تتحاكم عسكريا زيك زيهم.. ألف مبروك।


مبروك عليك يا عم المحاكمات العسكرية..حافظ بقى علي إستقرارك و تمسك بيه و شكك في كل من يعترض من حولك و أتهمة بالغباء و الخيانة الكبرى لمصلحة الوطن و البلد إللي حتضييع

تصدق إن أنا مبحبش التظاهر و عندي رهاب الزحام، بجد مش هزار

فلو عندك اقتراح لبديل فعال جاب نتيجة غير الشارع لو سمحت تقول لي عشان أعملة أنا و أمثالي نعمله و نرتاح

و مبروك عليك مرة تانية، ألف مبروك